ఆనందపు కలలు

కలలు చిట్లిపోగానే నిదుర లేచాను 
వేకువలో మరో క్రొత్తవెలుగు చూడాలని  
ఎన్నాళ్ళైనా ఆశగా ఎదురు చూస్తుంటాను 
ఆలోచన స్వాధీనంలోకి రాక మొరాయిస్తుంటే
మెదడులో మోసుకుని తిరుగుతూనే ఉంటాను.
ఆశ పుట్టిన రాత్రుల్లో ఆశ చావని రాత్రుల్లో
చలికి ముడుచుకునే వేళ్ళన్నింటినీ పైకెత్తి
ఊహల్లోని బొమ్మలను గీసి చుసుకుంటాను
వెలుగు నన్ను తాకినప్పుడల్లా ఓడిపోతూ
రాత్రి వెనుక రాత్రి జారినప్పుడు గెలుస్తున్నట్లు
కలల్లో ఆనందపు అంచులు తాకుతాను...  

కలలో వచ్చి

నీ కనులతో కళ్ళు కలిపి 
నన్ను నేను ఓడిపోయాను 
మనసు దోచి దాగుడుమూతలు 
దీపం వెలిగించి చీకటి చేసావెందుకు?
కలలో వచ్చి కునుకు దోచావు
మెలకువలో ఒంటరిని చేసావెందుకు?
నీ ప్రేమలో వెర్రిదాన్ని అయితి
నీతో మనసు ఇచ్చేసి
నన్ను నేను కోల్పోయాను..
నిన్ను కలవకపోతే  నా కనులు
వెర్రి మనసు నిశ్చింతగా నిదురోయేది   

కలల విందు

కునుకులమ్మ తీపికలల విందు చేసింది
ఆవలింతల ఆకు వేసి రమ్మని పిలిచింది 
చీకటి చెదిపోయే వరకూ నిదురపోయి 
వేకువ వచ్చి మేలుకొలిపే వరకూ 
కలల విందును ఆరగించమంది...... 

వాస్తవ కలలు..

మనం మన్లో చిదిమేసిన ఊహలు
బలవంతగా అణిచి వేసిన కోరికలు 
మన నిద్రలో మన వివేకం నిద్రపోయాక
కలల రూపంలో స్వైర విహారం చేస్తుంటాయీ.. 
కలల్లో మనం చూస్తాం వింటాం మాట్లాడతాం
పంచేంద్రియాలు పనిచేస్తున్నట్లే అనిపిస్తుంది
ఎన్ని కలలు కన్నా దేనికదే ప్రత్యేకం..
అందుకే కలలు కలలే వాస్తవాలు కావు!!!

కల

కళ్ళుమూసుకుని కలలు 
కన్నంత సులభం కాదు
కనులు తెరచి కలలను 
జీవితంలో నిజం చేసుకోవడం! 

సుందర స్వప్నం

చొరవ చేసి చెలీ అని పిలిచి
కలుపుగా కలిసి అలుపు తీర్చి 
సరిక్రొత్త బంధం పెనవేసావు..

కలగనని వైనం కంటికి చూపి
వెన్నెల కూడిన తేజం అందించి
సుందర స్వప్నం అయినావు.. 

ఎడారిలాంటి గొంతు తడార్చి
గుండెలలో సవ్వడి మ్రోగించి  
నన్ను వీడక నాతో ఉన్నావు..

కలల కావ్యం

కమ్మని కల

తన తలపుల్లో తనువు తల్లడిల్లే
తలచినదే తడువుగా తను అగుపడ  
తన్మయత్వపు తమకంలో తనువు తడిసె
తనలో నేను నాలో తను ఏకమవ్వాలని
జగమును మరిచి తరించాలని..
కోరికలు ఎన్నో తలపులలో తిడిగాడె 
తన కోసం నేను నాకోసం తను 
పుట్టామని మనసు గట్టిగా పలికె
కలలోనైనా తీరు అమేయముగా తోచె
కమ్మని కల నిజమైతే ఎంత మధురమో!

కల

కలయైనా నిజమైనా నిరాశలో ఒకటే

పగలైనా రేయైనా అంధునికి ఒకటేలే

ఆసరా

నాకూ తెలుసునులే..

కంటున్నవీ కనబోయే కలలు

కల్పితాలనీ, ఆశలు అసంకల్పితమనీ

అయినా జీవించడానికి ఏవో కొన్ని

అభూత కల్పనలు ఆసరా కావాలి కదా!  

కలతో ఆట

తాళ్ళతో బంధించినా సరే ఎందుకో
మనసు ముందుకు పరుగులిడుతుంది
కలలతో ఆడుతూనే నిదురించి 
లేస్తుంది...లేచి పరుగులెడుతుంది!
రాత్రంతా స్వప్నాల్లో మేల్కొని జాగారం చేసి 
పగలు అలసి అలకచెంది సాగనన్నది
సంధ్యవేళలో గుర్తించనట్లు నటిస్తూ
జ్ఞాపకాలు మళ్ళీ ఊపిరిపోసుకుంటున్నాది
కనులు చెమ్మగిల్లి సరిహద్దు లేని కన్నీటిలో 
కలలు కరిగిపోయి కొత్తకలతో ఆడుకోవాలని 
నిదురించే ప్రయత్నం చేస్తుంది మనసు.. 
కలతో ఆడుకుంటూ నిదురిస్తున్నాను నేను..

నా స్వప్నాలు

కన్నుల వెనుక స్వప్నంలో
మాటల వెనుక మౌనంగా
శ్వాస వెనుక స్పందనలా
విజయం వెనుక శ్రమవలె
గమ్యం వెనుక పయనమై
ఉండేవే నా కలలు ఊహలు 

మూసిన కళ్ళలో

కళ్ళు ముస్తేనే కల .....
కళ్ళు తెరిస్తే కరిపోయేను ఎలా?
నీ తపనలో నేను 
నా మనసును ఇలా వదిలేసాను!
కలలో నా కనులముందు ఉంటావు
ఇలలో రెక్కలున్నాయంటూ ఎగిరిపోతావు
అందుకే నువ్వు ఎప్పుడు గుర్తుకు వచ్చినా
కనులు మూసుకుని నిదుర పోతుంటాను!! 

15th Aug 2017

మనం కలగన్న స్వాతంత్య్ర భారతదేశాన్ని... 
అందరం కలిసిమెలిసి సుసంపన్నమై వర్ధిల్లేలా సం రక్షించుకుందాం
భారమాతకు జేజేలు జన్మభూమికి నమోఃవందనములు...  

కృషి..

సరైన కలలు కంటే సహకారం లభిస్తుంది
అవే పెట్టుబడులై మన ఉన్నతికి కారణం అవుతాయి
మన కలలు ప్రత్యేకంగా ఉంటే ప్రకాశిస్తాయి 
విభిన్న మార్గాల్లో ప్రయత్నిస్తే ఫలిస్తాయి 
నీవు ఎవరు ఏమిటని కలలు చూడవు 
నీకృషి ప్రయత్నాన్ని చూసి కలలు నిజమౌతాయి. 

కునుకులో

కునుకులో కన్న కలలు ఏం చేయలేమని  

కాళ్ళు చాపుకుని కదలకుండా కూర్చుంటే 

కన్న కల కరిపోయి నిరాశ మిగులుతుంది 

కార్యాచరణలో పెడితే స్వప్నం నిజమౌతుంది 

కలత

కునుకు పడితే కలల ప్రపంచం ఎంతో సుందరం
కలత చెందితే మనసు పడుతుంది ఆరాటం...

తీర్చుకునే కలలు కొన్ని

కలువకు చంద్రుడు దూరం కనుకనే చంద్రుడి పై కమలానికి అంత మమకారం...
జీవితం అందంగా ఆనందంగా ఉండదు కనుకనే కలల ద్వారా వాటిని నెరవేర్చుకుంటాం...
కలలు కనడం తప్పు కాదు కానీ వాటిని నిజం చేసుకునే ప్రయత్నం చేయకపోవడం నేరం...  

కలలు

కలలు కనడం అందరి జన్మ హక్కు

నెరవేర్చుకోకపోవడం మన తప్పు

బ్రతికున్నంత కాలం కలలు కంటుందాం 

తీర్చుకునే ప్రయత్నం మాత్రం తప్పక చేద్దాం